Ika-123 nga Rizal Day giuwan

CEBU, Philippines —  Bisan sa bunok sa uwan wala kini nakapatarug sa mga tawo nga nitambong sa ika-123 ka tuig sa Rizal Day Celebration sa Plaza Sugbo sa Dakbayan sa Sugbo kagahapon sa buntag nga gipangulohan ni Mayor Edgardo Labella.

Ang kalihukan gisugdan sa usa ka Santos nga Misa nga gipangulohan ni Fr. Andrei Ventanilla, chairman sa Commission on Youth.

Matud ni Ventanilla nga angayang dili kalimtan sa katawhan ang balor sa sakripisyo alang sa kaayuhan sa tanan ug labaw na ngadto sa Ginoo kung diin gikan kaniya ang tanan nga kaayuhan.

Samtang si Labella sa iyang bahin nibatbat sa katapusang bahin sa Mi Ultimo Adios ni Rizal ug nagdasig sa katawhan nga sundon ang mga hiyas niini ug batokan ang tanang hagit nga giatubang karon sama sa gubat batok sa corruption, cybersex ug uban pa aron ang mga nahimo nga kaayuhan ni Rizal dili mawagtang sa kalimot ug masayang lang.

Nakighiusa sab ang katawhang Oponganon sa kasaulogan nga giapilan sa mga opisyal ug kawani sa kagamhanan sa Dakbayan sa Lapu-Lapu, Philippine National Police, Philippine Air Force, Department of Education, mga opisyal sa barangay ug uban pa.

Si Bise Mayor Celedonio Sitoy ang nangulo sa kalihukan isip acting mayor sanglit si Mayor Junard “Ahong” Chan tua man sa gawas sa nasud.

Si Sitoy nipahinumdum sa talagsaong mithi ni Dr. Jose Rizal sa pagdasig sa mga batan-on ubos niining modernong panahon.

Samtang ang pagka-independente sa kaugalingon maoy panawagan sa Negros Oriental Provincial Police Office sa publiko subay sa pagtimaan sa kamatayon ni Rizal.

Matud ni NORPPO Provincial Director Police Colonel Julian Entoma nga kinahanglan nga dili magsalig sa laing tawo ilabi na ang seguridad niiini.

Kini tungod ky dili kanunay nga makatabang ang kapolisan bisan pa man nga hugot ang seguridad nga ilang gipatuman.

Dugang ni Entoma nga sama sa kaisog ni Rizal kinahanglan maisogon sab nga protektahan ang publiko ug dili magpadala sa mga pagpangilad sa progresibong grupo.

Gipanawagan usab niya nga tabangan ug suportahan sa publiko ang mga programa sa kapolisan ilabi na nga makatabang kini sa ilang kaluwasan batok sa mga adunay dautang tumong.  GMR (BANATNEWS)