Tarpaulins gipalit para sa mga biktima sa bagyo

CEBU, Philippines — Mga pamilya diha sa lungsod sa Daanbantayan kansang mga balay nangaguba tungod sa bagyong Ursula gipamalitan og trapal sa munisipyo human nadeklarar ang state of calamity didto.

Sumala pa nga kapin 16,000 ka balay ang naapektahan sa maong bagyo hinungdan nga ang Daanbantayan local government migamit sa ilang Quick Response Fund (QRF) aron makapalit og trapal aron magamit dayon salimbong sa ilang nanglupad nga mga  atop.

Si Daanbantayan Mayor Sun Shimura miingon nga magamit dayon ang mga tarpaulins sa mga biktima. Disyembre 26 sa dihang gideklarar ang state of calamity human sa pag-igo sa bagyo niadtong Disyembre 24.

Moabot sa 6,000 ka balay ang nangaguba gyud samtang dul-an 10 mil ang partially damaged.

Ang lungsod aduna pay P3.9M QRF nga maoy ilang gipangpalit sa mga tarpaulins ug gikinahanglang gamitonon sa mga biktima sama sa water-resistant plywood alang sa mga mananagat nga ang mga bangka nangaguba.

Base sa ilang pagsusi dunay 119 ka mga bangka ang nangaguba sa bagyo. Apan giklaro sa mayor nga kadto lang mga rehistradong mananagat diha sa Daanbantayan Municipal Agriculture Office ang matagaan niining mga marine plywood.

Gipaabot pa sa mayor nga maaprubahan ang pagpagawas og pundo alang sa financial assistance sa mga biktima nga ilang gipaabot pinaagi kang Governor Gwendolyn Garcia ngadto kang Department of Social Welfare and Development (DSWD)- 7 Regional Director Rebecca Gaemala. Gikan sa The Freeman/IBM