Mga utanon ipalakip sa feeding program

CEBU, Philippines — Giawhag sa konseho sa Siyudad sa Sugbo ang Department of Social Welfare Services nga maghimo og sa usa ka plant-based diet sa nagpadayong Supplemental Feeding Program (SFP) sa mga day care centers (DCC). Ang gisugyot nga resolusyon ni Konsehal Alvin Dizon nagtinguha sa paglakip sa mga pagkaon nga maayo sa panglawas.

Matud ni Dizon nga ang SFP gituyo alang sa pagsulbad sa malnutrisyon, stunting, overweight, ug sobra nga katambok sa mga bata.

Kaniadtong 2018, ang Republic Act No. 11037 o ang “Masustansyang Pagkain Para sa Batang Pilipino Act” gipasar aron pagpakigbatok sa kagutom sa mga batang Pilipino.

Sama sa World Health Organization, ang mga bata nga overweight adunay mas daghang kahigayunan nga magpabiling obese hangtud madaku nga mao ang hinungdan sa mga non-communciable disease (NCDs) sama sa diabetes ug cardiovascular disease.

Giingon usab nga sa Pilipinas ang mga NCD mao ang nag-una nga killer nga sakit diin 50 porsyento sa tanan nga namatay matag tuig.

Aron mapugngan kini, ang pag-apil sa usa ka himsog nga lifestyle pinaagi sa pagpili sa saktong pagkaon sa mga bata mahimong  daku nga makatabang sa pagpugong sa mga sakit. Sa resolusyon, si Dizon nisugyot nga ang malunggay, alugbati, ug galay (camote tops) usa sa mga bantog, himsog, accessible ug barato nga mga utanon nga mahimong ikuyog sa programa sa pagpakaon.

Giawhag sa resolusyon nga ang DSWS ug ang organisasyon sa mga ginikanan nga unahon kining tulo ka mga utanon sa ilang pagplano ug pag-andam sa pagkaon. Ang Department of Social Welfare and Department 7 nipahibawo nga sa pagkakaron ila na nga gipatuman ang Cycle 9 sa SFP.

Tumong sa programa nga mapaayo ug mapadayon ang kahimtang sa nutrisyon sa mga bata sa lainlaing lokal nga kagamhanan nga gidumala sa mga DCC ug Supervised Neighborhood Play nga mga lugar ug komunidad. /GMR (BANATNEWS)