P10 milyones Marijuana gilarot

CEBU, Philippines — Kapin sa 10 mil ka punoan sa marijuana nga gibanabanang mokantidad og P10 milyones pesos ang gilarot sa kapolisan gikan sa hilit nga bahin sa Sitio Hikapon, Barangay General Climaco sa Dakbayan sa Toledo niadtong Biyernes sa buntag.

Ang grupo sa Regional Mobile Force Battalion-7  pinangulohan ni PLtCol Hector Grijaldo Jr., Force Commander,ug mga sakop sa 703rd Mobile Company ni PMaj Leo T Logroño, 701st Mobile Company ni PMaj Manuel Cabanlit ug us aka team gikan sa Bravo Company 47 Infantry Battalion pinangulohan ni 1LT Micheal Imperial uban sa pakigalayon sa Philippine Drug Enforcement Agency-7 milusad niining maong operasyon.

Atol sa operasyon, giibot sa mga otoridad ang gibanabanang 20 mil ka punoan sa tanom nga marijuana. Ang maong mga tanom hamtong na ug hapit nang ma-harvest. Gibanabanang mokantidad kini og P8 milyones.

Dugang naibot sa kapolisan ang 10 mil sab ka marijuana seedlings nga gibanabanang nagkantidad og P2 milyones.

Ang lugar nahimutang sa bukirong bahin sa maong barangay ug layo kaayo sa karsada. Tungod niini, nagkuha nalang ang mga otoridad og mga sampol aron himuong ebidensya samtang ang uban diha na sa maong dapit gidauban.

Ang maong operasyon gisaksihan og mga barangay officials. Ang mga gikuhang ebidensya dad-on ngadto sa Regional Crime Laboratory Office 7 alang sa laboratory examination. (BANATNEWS)