Barangay Inayawan ipaubos sa state of calamity

CEBU, Philippines — Opisyales sa Barangay Inayawan nagtinguha sa pagpaubos og state of calamity sa ilang barangay human sa nahitabong sunog nga niulbo niadtong Biyernes sa hapon.

Ang lugar nga naapektohan sa sunog mao ang Sitio Lourdes White Road.

Nikabat sa 50 ka balay ang naugdaw sa nahisgutang sunog ug 85 ka pamilya ang naapektohan o 304 ka indibidwal base sa talaan sa barangay.

Matud ni Vince Monterde, barangay administrator nga mopatawag og tigom si Kapitan Kirk Bryan Repollo sa mga opisyal sa barangay aron tukion ang pagdeklarar og state of calamity.

Ang mga biktima sa sunog kasamtangang nagpasilong diha sa sports complex sa barangay.

Gitug-an ni Monterde nga nagkinahanglan karon ang mga biktima og mga sabon, shampoo, toothpaste, tooth brush alang sa ilang personal hygiene, diaper alang sa mga bata, bugas, habol, mga sinena ug under wears.

Ang mga hinabang mahimo kining ihatud diha sa barangay hall sa Inayawan.

Sa pagkakaron ang mga nasunogan nakadawat kini og hinabang sulod sa tulo ka adlaw nilang konsumo nga gilangkuban sa mga pagkaon ug uban pa gikan sa kagamhanan sa siyudad.

Matud usab ni Monterde nga ang maong gidaghanon sa biktima nga ilang natala initial pa kini tungod kay wala pa moadto sa barangay hall ang ubang mga nasunogan.

Gikataho nga ang kayo sa sunog nagsugod kini sa panimalay nila ni Joseph ug Clarissa Bonghanoy.

Ang kabomberohan nagpahigayon pa kini imbestigasyon sa maong hitabo. /BDB (BANATNEWS)