Checkpoint sa Mandaue, pito ka tawo nadakpan

CEBU, Philippines — Pito ka mga tawo ang nasikop atol sa gipahigayon nga check point sa kapulisan sa Dakbayan sa Mandaue nga gipahigayon sa may A. Del Rosario Street, Barangay Guizo, Mandaue City tungod sa paghupot og illegal nga drugas Biyernes sa gabii.

Ang nasikop mao sila si Gilbert Filomeno, 50; Jason Companero, 28; Josua Manatad, 23; Angeloto Malabihag, 21; Nicol Ombahino, 37; Albert Tapulayan, 36; ug Glenpray Daño, 32, taga Maribago, Lapu-lapu City.

Nasakmit gikan sa mga dinakpan ang pinutos sa ginadiling drugas nga motimbang og  1.40 gramos nga mobalor og P10 mil kagamitan sa pagsuyop ug mga motorsiklong ilang giluwanan.

Matud pa ni Police Major Ramil Morpos, nagpahigayon sila og checkpoint sa dihang naaktohan nga nakita gikan sa ilang posisyon ang mga kontrabando, hinungdan nga sila gipangtanggong.

Samtang usa ka lalaki ang nadakpan sa buybust operation sa mga sakop sa Tuburan Police Station sa Barangay Daanlungsod sa Lungsod sa Tuburan.

Giila ang dinakpan nga si Jovan Lozaga Saludar,20, nagpuyo sa maong dapit.

Matud ni Police Lieutenant Colonel Florendo Fajardo hepe sa Tuburan Police Station nga taud-taod na usab nila nga gimonitor si Saludar human nga nakadawat sila og impormasyon kalabot sa pamaligya niini og illegal nga drugas.

Dugang pa ni Fajardo nga ang tig-supply sa drugas ni Saludar gikan kini sa Sugbo ug sa Dakbayan sa Talisay  Apan padayon pa gisubay kung kinsa gyud ang amo ni Saludar.

Nakuha gikan sa posisyon ni Saludar mao ang mga pinakiti nga shabu nga mo balor lang ngadto sa kapin P5 mil nga shabu. /IBM (BANATNEWS)