Gwen gusto’g ‘well-rounded’ nga mga magtutudlo

CEBU, Philippines – Buot si Gob. Gwendolyn Garcia nga “well-rounded” ang mga magtutudlo sa Probinsiya sa Sugbo. Kini human nasayran nga pipila sa mga magtutudlo ang kinahanglan og “specialization” sa pagtudlo sa mga tinun-an sa mga core subjects.

Sumala pa ni Garcia nga atol sa Provincial School Board meeting, usa sa mga representante sa Department of Education ang nibungat niini. “Mao lage kuno kay di ba 15-year old man to ang gipang-test. Mao kuno kay ang mga teachers wala lagi kunoy specialization mao na nga maski dili specialization niya ang Science gipatudlo og Science and so on and so forth,” matud ni Garcia. “These are grade 7 and grade 8 ngano unsa naman lang inyong gitudlo sa grade 7 ug grade 8 bahin sa Science pang-Ph.D. na? Or for that matter pang-masteral na? If you are a teacher you supposed to be well rounded,” dugang sa gobernador.

Gisugyot usab sa gobernador nga ang trainings o seminar alang sa “specialization” sa magtutudlo ipahigayon atol sa bakasyon ug dili atol sa academic year tungod kay makakuha kini sa oras ug adlaw nga angay unta itudlo sa mga tinun-an. – Le Phyllis F. Antojado/GMR

Kapitolyo nanghatag na sa cash incentives sa barangay

Hingpit na nga nadawat sa mga frontliners sa mga barangay sa Lalawigan sa Sugbo ang ilang honorarium gikan sa Kapitolyo kagahapon.

Kini atol sa unang general assembly nga gipahigayon sa Minganilla Sports Complex nga gitambongan sa kapin 13,000 ka barangay health workers, nutrition scholars, animal health aide, ug day care workers.

Si Gob. Gwendolyn Garcia nga nitambong sa kalihukan una na nga nisaad nga umentohan ang incentive nga ihatag sa mga barangay frontline workers gikan sa P1,500 sa mga tanod kaniadto, karon mahimo na nga P3,000 samtang gikan sa P2,400 nahimo na kining P4,000 sa sa ubang kawani sa barangay.

“Ilang kalauman nga samtang niana pa si Gwen Garcia, ang kadtong ilang naandan nga pagpangga nila ug paghatag og bili sa ilang daku kaayo nga tabang sa Probinsiya sa Sugbo, ila gayud matagamtam.

Sugod pa lang ni, gani unang unom ka bulan pa lang sa akong pagbalik, ako na gituman akong saad,” matud ni Garcia.

Gawas sa cash gift, giapod-pod sab sa Kapitolyo ang kits sa mga BHWs, Christmas goodies ug giapil sa group accident insurance.

Ang cash gift sa mga tanod una na nga giingon ni Garcia nga ideretso na lang og hatag gikan sa Provincial Treasurer’s Office ngadto sa mga tanod.

Ang mga nakadawat nga barangay workers kagahapon gikan sa 39 ka lungsod ug pito ka component cities sa Lalawigan sa Sugbo. /GMR (BANAT NEWS)