Gikan nangombira sa birthday party gipatay
CEBU, Philippines — Gipusil patay ang usa ka lalaki samtang paingon na pauli sa ilang panimalay alas 4 lunes sa kaadlawon didto sa Brgy. Fuente, Lungsod sa Carmen.
Ang biktima giila sa kapolisan nga si Rudy Bejoc, 23 anyos usa ka construction worker nga nagpuyo sa maong dapit.
Matud pa ni Police Staff Sargeant Ronald Anoche ang imbistigador sa Carmen Police Station, gikan ang biktima sa Siyudad sa Danao kay mitambong og birthday party uban sa iyang kanhi bayaw.
Human didto, mihapit pa ang duha sa usa ka imnanan ayha pa namauli sakay og motorsiklo.
Gikatahong pagabot sa Brgy. Fuente mikanaog si Bejoc ug subay sa pamahayag sa igsuon niini nianang miaging alas 2 pasado sa kaadlawon nakadungog sila og panaglalis nga gisundan usab og lanog nga mga buto sa armas.
Sa dihang ilang gisusi, napalgan nalang ang biktima nga adunay duha ka samad pinusilan sa luyo sa tangkugo ug buko-buko nga maoy hinongdan sa iyang hinanaling kamatayon.
Walay nakuhang basiyo sa bala diha sa crime scene samtang padayon pa ang imbestigasyon sa kapolisan kun kinsa ang nagpatay sa biktima ug kun unsa ang motibo niini. (BANAT NEWS)
- Latest