Puto, sikwati matag human sa Misa de Gallo

CEBU, Philippines — Ang kabugnaw sa sayo sa kaadlawon maoy dakung tabang alang sa mga maninda og puto ug sikwati nga maoy puntariya sa mga gikan sa simbahan aron mamainit.

Si Jenelyn Ycot ug iyang pamilya nga usa sa mga naninda og puto ug sikwati ang nangita gyud og pamaagi nga makapaninda lang sa Dakbayan sa Mandaue niining panahon sa Misa de Gallo.

Naandan na nila sulod sa nanglabay nga katuigan ang pagpaninda og puto ug sikwati sa matag Misa de Gallo nga maoy tapukan sa mga tawo sa pagpanggawas sa simbahan.

Matud ni Jenelyn nga maglaray sila kaniadto nga maninda og puto ug sikwati sa daplin sa karsada sayo sa kaadlawon sanglit niadtong mga panahona dili pa kaayo istrikto ang gobiyerno sa mga sidewalk vendors.

Gitug-an ni Jenelyn nga dili na hinoon sila daghan karon ang naninda og puto ug sikwati sa ilang naandan nga gipanindahan tungod kay pipila lang sila ang nakahunahuna sa pag-abang sa atubangan sa usa ka establisemento sa kantidad nga P10,000 sulod lang sa siyam ka kaadlawon.

Sa nilabay nga duha na ka kaadlawon maoy ilang namatikdan nga nagkadaghan ang mahiligon sa pagpainit og puto ug sikwati human sa ilang pagsimba hinungdan nga magkapuliki sila sa pag-timan sa mamainit nilang kustomer.

Samtang gihulagway sa Cebu City Police Office nga hapsay ug malinawon ang unang duha ka Misa de Gallo sa Dakbayan sa Sugbo.

Kini base sa closed monitoring sa CCPO sa 37 ka simbahan ug ang misa sa Carbon Public Market sulod sa siyam ka kaadlawon.

Matud ni Police Lieutenant Colonel Clark Suarez Arriola, ang tigpamaba sa CCPO, nga walay insidenti nga natala ang kapolisan sama sa mga pagpangawat, pangpanulis ug uban pa sa mga manimbahay matag kaadlawon.

Adunay mga public assistance desks ang gipangbutang sa 37 ka simbahan nga mamahimo nga maduolan sa publiko kun adunay kakulian nga masugatan.

Gipasalig niya nga magpadayon ang full alert status hangtud na sa Sinulog 2020.

Aduna say mga standby personnel sa mga headquarters nga maoy madali-dali nga i-deploy kun adunay kakulian sa dapit.

Ang national headquarters sa kapolisan nimando sa tanang rehiyon nga full alert status hangtud sa Enero 5, 2020. (BANAT NEWS)