Poultry sa Talisay nga gireklamo sa kabaho gipasirado

CEBU, Philippines — Gipasirado kagahapon sa kagamhanan sa Dakbayan sa Talisay ang poultry farm kinsa gireklamo nga naghatag og kabaho.

Si Atty. Giovanni Sususco, city legal officer sa siyudad nibutyag nga gawas sa mga reklamo nga nadawat gumikan sa kabaho walay business permit ang maong poultry farm nga nahimutang diha sa Sitio Libo, Barangay Mohon ug gipanag-iya kini ni Shu Jia Chen.

Ang kagamhanan sa siyudad nipadala og notisya batok sa maong poultry farm sa pagpahunong sa operasyon niini.

Matud ni Sususco nga agricultural area ang nahimutangan sa maong poultry apan nahimo na kining residential karon.

Si Sususco nagkanayon nga gihatagan na og usa ka tuig nga lugway ang maong kompaniya aron makapangita og kabalhinan apan nagpadayon gihapon kini sa ilang operasyon diha sa nahisgutang lugar.

Ang siyudad nipadala na usab og show cause order batok sa maong poultry apan wala gihapon kini motuman hinungdan nga gipasiradohan na kini.

Usa ka kawani sa city hall ang nisulod ug nitunol sa closure order batok sa poultry farm.

Usa lang ka kawani sa city hall ang gitahasan nga mosulod ug motunol sa closure order sa maong poultry farm. (BANAT NEWS)