Unang Misa de Gallo malinawon

CEBU, Philippines — Gipaubos sa heightened alert ang kapulisan sa Central Visayas sa pagsugod sa unang adlaw sa Misa de Gallo hangtod na sa pagsugat sa Bag-ong Tuig.

Kini ang gitug-an sa pangulo sa Police Regional Office 7 Police Brigadier General Valeriano De Leon.

Matud pa ni De Leon, wala silay nadawat nga mga alarma atol sa unang Misa de Gallo kagahapon ug gusto niyang magpadayon kini hangtud sa hangtud.

Sumala pa ni De Leon, ilang pahugtan ang mobile patrol ug police visibility samtang magpadayon sa pagpahugot sa seguridad.

Pahugtan usab pagbantay ang mga terminal ug airport ilabi na sa mga posibleng mga hulga nga motumaw.

Gidasig usab ni De Leon ang mga provincial directors ug commanders sa kapulisan nga motambong sa Misa de Gallo aron makakita sila sa kahimtang.

Si De Leon mopahigayon usab og inspeksyon sa mga simbahan aron sa pagsusi kung alerto ba ang kapulisan sa pagbantay sa seguridad.

Kagahapong adlawa sa unang Misa de Gallo , bisan sa pagbunok sa ulan wala kini nakapaluya sa mga magtutuo nga nitambong sa unang adlaw sa misa de gallo nga gipahigayon sa tanang mga parokya sa Archdiocese of Cebu.

Sa Mary Help Of Christian Parish sa Barangay Buhisan nagsugwak ang bagang duot sa mga magtutuo nga mitambong sa Santos nga Misa nga gipangulohan ni Fr. Mhar Vincent Balili.

Kauban ni Balili ang General Manager sa DyRF Fr. Roberto M. Ebisa, ug Assistant General Manager sa DyRF Fr. Felmar Fiel.

Gipahimug-atan ni Balili ang kahulogan sa Misa de Gallo, nga buot pasabot misa nga pahinungod sa mahal nga birhen.

Sumala pa ni Balili, angay ipasalamat sa mga tawo nga nagpadayon ang tradisyon sa Misa de Gallo sa Pilipinas ug malaumon siya nga magpadayon kini sa mosunod pang mga henerasyon.

Gitug-an ni Balili, ang misa de gallo panahon sa pagpasalamat ug dili lang sa pagpangayo.  Gitug-an ni Balili, angay pamalandongan sa katawhan ang siyam ka adlaw nga kaadlawon sa ilang pagsakripisyo ug lakip usab ang ilang iregalo ngadto sa Ginoo.

Sa Dakbayan sa Talisay gitug-an ni Police Major Gerard Ace Pelare, pangulo sa Talisay City Police Station nga malampuson ug malinawon ang unang adlaw sa Misa de Gallo sa dakbayan.

Dako sab og papel ang mga sakop sa City of Talisay-Traffic Operation Development Authority (CT-TODA), barangay tanod, City Disaster Risk Reduction and Management Office (CDRRMO) nga nakita sab ang kahago aron malinawon ang kalihukan.

Gipanghinaot ni Pelare nga unta magpadayon kini hangtud na sa katapusang adlaw sa Misa de Gallo.  IBM (BANATNEWS)