Babaye gipatay sa kapuyo tungod sa selos

CEBU, Philippines — Usa ka babaye ang gipusil-patay sa iyang kapuyo tungod sa selos diha sa lungsod sa Liloan, kaniadtong Sabado sa alas 5 sa buntag Disyembre 14,2019.

Ang biktima giilang si Bianca Paige Pilapil Bayang, 25, residente sa Sitio Mahayahay, Barangay San Vicente, Liloan diin nahitabo ang pagpatay.

Samtang ang suspetsado giila nga si Eldie Cabahug Orquiza, 26,kapuyo sa biktima.

Si Police Major Danilo Colipano, ang hepe sa Liloan Police Station, nagkanayon nga ang biktima ug ang suspek adunay mainit nga argumento sa nanglabay nga mga adlaw sa wala pa ang insidente.

Sa adlaw pagkahitabo, nabatian sa mga silingan nga nag-away ang duha ala una na sa kaadlawon ug nakadungog sila og usa ka buto sa armas apan walay nasyaod kun gikan kini sa panimalay sa duha.

“Sa wala pa mahitabo, nahibal-an nato sa ilang mga silingan nga siya (biktima) naglalis sa iyang kapuyo.Mao ‘tp pagbumtag niana nakit-an na nga patay na( si Bayang),” matud ni Colipano.

Mga alas 5:00 sa buntag nakit-an sa silingan nga patay na si Bayang, pipila ka metro ang gilay-on sa ilang balay. Duna kini samad pinusilan sa ulo nga gituohan nga hinungdan sa iyang kamatayon.

Sa inisyal nga imbestigasyon, si Colipano miingon nga selos ang motibo sa pagpatay kay giingong gipasanginlan sa suspek ang biktima nga dunay kabit.

Nianang pagkahapon sa samang adlaw boluntaryong nitahan sa kapolisan ang maong suspek ug gitahan sab niini ang armas nga gigamit sa maong krimen. /IBM (BANATNEWS)