Lalaki gipusil patay

CEBU, Philippines — Gipusil patay ang usa ka lalaki samtang kini naglakaw diha sa Sta. Lucia Property, Riverside, Poblacion Oriental, Lungsod sa Consolacion  Biyernes sa gabii.

Ang biktima giila sa kapolisan nga si Allan Ceballos Zapanta ,39, nag puyo sa Pulpogan 3,Pulpogan sa naasuy nga lungsod.

Matud pa ni Police Major Verniño Noserale, hepe sa Consolacion Police Station naglakaw ang biktima sa dalan sa dihang gitaparan kini og motorsiklong dunay duha ka wala mailhing mga lalaki ug kalit nga mipaulan og bala kaniya.

Ang biktima naka angkon og daghang samad pinusilan sa nagkadaiyang parte sa lawas nga maoy hinungdan sa iyang hinanaling kamatayon.

Gibutyag ni Noserale nga niadtong duha ka semana na ang nakalabay nadakpan nila si Zapanta tungod sa paghubog-hubog ug nagdaladala kini og kutsilyo. Padayon pang nagimbestigar ang kapolisan kun unsay motibo ug kun si kinsa ang nagpatay sa biktima. /IBM (BANATNEWS)