Wanted persons hayan manguli sa Pasko

CEBU, Philippines — Andam na ang kapolisan sa Pasko diin usa nga ilang tutukan ang mga wanted persons nga posibleng masigpatan sa mga terminals ug pantalan.

Kini maoy gibutyag ni Cebu City Police Office (CCPO) Operation Branch chief, Police Lieutenant Colonel Allan Rosario, kinsa niingon nga gawas sa seguridad sa simbahan, usa sab nila nga bantayan ang posibilidad nga adunay mouli sa kabanay nga personalidad nga gipangita sa balaud.

Dugang ni Rosario nga makig-alayon sila sa mga ahensya sama sa Cebu Port Authority (CPA) ug Cebu South Bus Terminal nga modangkop dayon sa kapolisan kung aduna sila masigpatan.

Aduna usab silay mga flyers nga ipangapod-apod ngadto sa mga pantalan ug terminal sa luwas nga pagbiyahe sa holiday season ug aduna usab mga hulagway sa mga wanted persons sa Police Regional Office 7.

Gipasalig usab ni Rosario nga bisan pa man nga holiday padayon gihapon ang ilang pagpangdakop ug pagpangita sa mga wanted sa Sugbo.

Samtang si PRO-7 Director, Police Brigadier General Valeriano De Leon, nagkanayon nga bisan pa man holiday padayon gihapon ang operasyon batok sa illegal firearms sa tibuok Central Visayas aron pagkab-ot sa hapsay ug malinawon nga Pasko ug Bag-ong Tuig.

Giawhag ni De Leon ang publiko o kinsa man nga adunay armas nga lisensyado nga dili magpabuto aron malikayan ang mga saag nga bala nga makaigo og inosente.

Hingusgan sab sa kapolisan ang pagpandakop sa mga ginadili nga mga pabuto. –/GMR BANAT NEWS