Patay’ng lawas sa Olangi nailhan na

CEBU, Philippines – Giila na sa mga sakop sa pamilya ang patay’ng lawas nga napalgang naglutaw sa kadagatan sa Barangay San Vicente sa Isla sa Olango sa Dakbayan sa Lapu-Lapu ala una pasado ang takna sa hapon niadtong Lunes.

Matud ni Police Master Sergeant Wilson Malnegro sa Presinto 2 sa Lapu-Lapu City Police Office (LLCPO) nga ang patay’ng lawas giila nga si Rogelio Wenceslao Formentera, 51-anyos, taga Barangay Taytay sa Dakbayan sa Danao.

Si Malnegro niingon nga alas 8 na pasado sa Lunes sa gabii nga nahidangat ang mga sakop sa pamilya gikan sa Dakbayan sa Danao sa pagsusi sa patay’ng lawas nga napalgan sa kadagatan sa Isla sa Olango.

Matud ni Malnegro nga nakadawat na sila og mga taho gikan sa kapolisan sa Dakbayan sa Danao labot sa missing person nga gipangita sa mga sakop sa pamilya nga giingong nanagat ug wala na mahiuli sa ilang panimalay sukad pa sa niaging Domingo.

Dugang ni Malnegro nga ang kapolisan sa Dakbayan sa Danao nga ilang gipahibalo labot sa napalgang patay’ng lawas nga napalgan sa Isla sa Olango dali usab nga nipahibalo ngadto sa mga sakop sa pamilya alang sa paghimo og pakisusi niini.

Si Malnegro niingon nga sa ilang paghulagway sa napalgang patay’ng lawas nga naglakip sa gisul-ob nga grey sweatshirt, ug nagkwentas og silver necklace dali nga nakahilak ang anak niining babaye nga nahinabi sa kapolisan sa telepono.

Ang mga sakop sa Philippine Coast Guard maoy nag-ugkat sa patay’ng lawas human kini ikataho sa mga mananagat nga unang nakasigpat niini sa maong lugar.

Si Malnegro niingon nga kasamtangang karon nilang gipaabot ang resulta sa autopsy alang sa pagsuta kun may foul play ba o wala ang kamatayon ni Formentera. /GMR (BANAT NEWS)