Supply sa MCWD gikan sa Luyang padayon

CEBU, Philippines – Magpadayon gihapon ang pag-supply og tubig gikan sa Luyang River sa Lungsod sa Carmen sa Metro Cebu. Kini bisan pa man nga i-terminate na sa Probinsiya sa Sugbo ang kasabotan tali sa Manila Water Consortium Inc.

Si Gobernador Gwendolyn Garcia nipasabot nga ang gi-terminate sa Kapitolyo mao ang kasabotan tali sa MWCI apan ang Joint Investment Company (JICO) magpabilin gihapon.

Ang MWCI ug ang Kapitolyo nisulod og Joint Investment Agreement (JIA) alang sa pag-umol sa Cebu Manila Water Development, Inc. (CMWDI) nga usa ka joint investment company alang sa pagtukod ug pag-develop sa pasilidad alang sa pag-supply og bulto nga tubig.

“Karon nag-supply ra man ta og bulk, we are not really into the distribution so I think, ang laing ma-concern ani kay MCWD because we are supplying 35 million litres a day and I believe, since the JICO exist then the supply should continue why we settle our own problems,” matud Garcia.

Ang 35 milyones nga litro sa tubig matag adlaw nga i-supply ngadto sa MCWD maoy tinubdan sa tubig sa pipila ka lungsod ug dakbayan sama sa Liloan, Consolacion, Compostela ug Dakbayan sa Lapu-Lapu ug Mandaue.

Matud ni Garcia nga wala niya gitan-aw ang pagpahunong sa supply sa tubig sa Metro Cebu ug nagkanayon nga ang sulbaron lang nila karon nga problema mao ang kalapasan nga nahimo sa MWCI sa joint investment agreement niini. /GMR (BANAT NEWS)