Siyam ka Misa de Gallo ni Palma

CEBU, Philippines – Walo ka lugar ang pahigayonan ni Cebu Archbishop Jose Palma sa iyang Misa de Gallo nga magsugod karong Disyembre 16 ngadto sa 24 sa kaadlawon.

Unang misahan sa Arsobispo sa Disyembre 16 sa alas 4 sa kaadlawon ang Carbon Public Market, Disyembre 17 sa alas 4:30 ang Cebu Archdiocesan Shrine of San Pedro Calungsod; Disyembre 18 sa San Pedro Calungsod Parish-Pulangbato; Disyembre 21 sa Santa Monica Parish sa Cawayan, Dalaguete; Disyembre 22 sa Manlapay, Dalaguete; Disyembre 23 sa St. Joseph Parish sa Sangi, Alegria; Disyembre 24 sa CCTN Channel 47 ug sa alas 10 sa gabii atol sa pagsugat sa Pasko ang Santos nga Misa ipahigayon sa Cebu Metropolitan Cathedral.

Matud ni Palma nga mapasalamaton siya sa Ginoo sa nindot nga tradisyon sa Misa de Gallo diin sayo sa buntag magtigum ang tanan alang sa pagsaulog sa Santos nga Misa diin usa ka mahinungdanon nga pagpakatawo sa Ginoo ang siyam ka adlaw nga misa.

Dugang ni Palma nga siyam ka adlaw nga sayo sa kabuntagon magtigum alang sa pagpamalandong sa kaayo sa Ginoo ug pagpangga niini pinaagi sa Mahal nga Birhen Maria.

Sumala pa ni Palma nga isip mga Kristohanon, pinaagi sa paghatag og panahon aron makapadangat ug pagbag-o sa kasingkasing o real conversion of heart.

Malaumon ang Arsobispo nga niining pagsaulog sa pagkatawo sa Ginoo mahimo kining tinuod nga pagdawat Kaniya sa katawhan diha sa ilang tagsa-tagsa ka kasing-kasing ug kinabuhi. /GMR (BANAT NEWS)