Sunog gibantayan nunot sa kapaskohan; 45 ka balay sa Talisay naugdaw

CEBU, Philippines – Ang kadagkoan sa Bureau of Fire Protection-7 subling mipahimangno sa publiko nga mag-amping kanunay tungod sa peligro sa sunog nunot niining nagsingabot nga kapaskohan, samtang 45 kapin ug kulang ka panimay ang naugdaw sa sunog nga niulbo diha sa Upper Cadicay, Barangay Lawaan 3, Dakbayan sa Talisay niadtong Lunes sa gabii.

Nadawat ang alarma sa kabumberohan mga alas 11:38 sa gabie. Si FO2 Junriel Siaboc, imbestigador sa Talisay City Fire Station nibutyag nga naglisod gyud sila sa pagpawong sa kalayo gumikan sa kahagip-ot sa lugar.

Gani ang ilang fire trucks wala gyud makasulod sa lugar nga nasunogan hinungdan nga ilang gisumpay-sumpay ang ilang mga hose.

Si Siaboc niingon nga ilang nakontrolar ang kalayo mga alas 12:28 sa tungang gabie.

Si Adrea Cabradilla, 66 , nagkanayon nga gikan siya nga namasko sa dihang nauli nga nahanaw na ang ilang pinuy-anan.

Samtang si Evelyn Cabradilla, nitataw nga wa na masalbar ang iyang gamay nga tinigom tungod sa maong sunog. Igo nalang sa pagpatulo sa iyang luha ang nabiktima sa sunog.

Si Mayor Gerald Anthony “Samsam” Gullas Jr. sayo nga misusi sa kahimtang sa mga nasunogan ug nimando sa dinalian nga paghatag og tabang sa mga nasunogan.

Matud pa ni Konsehal Rodulfo Cabigas nga pinaagi sa City Social Welfare and Development (CSWD) gipangapuran na ang mga pamilyang naapektuhan sa ilang labing dinaliang panginahanglan sama sa pagkaon, tubig ug gamit sa pagkatulog.

Sigon pa niya nga susihon pa sab gyud nila kung kinsa ang angay nga mahatagan sa pinansyal nga tabang aron sila makatukod pagbalik sa ilang pinuya-anan.

Nagkanayon si Siaboc nga posible nga electical misuse ang hinungdan nga nikuyanap ang kayo.  Gibana-bana nga muabot sa P100 mil ang danyos sa maong sunog.

Samtang ang kabomberohan sa Central Visayas, molusad sa ilang Oplan Paalala, sunod semana subay sa nagsingabot nga Pasko ug Bag-ong Tuig matud pa ni Senior Supt. Gilbert Dolot, ang Regional Director sa BFP-7 nga nahinabi sa Banat News.

Matud pa ni Dolot, gusto nilang pahinumduman ang publiko kini sa mga butang nga angay likayan ug angayang buhaton aron malikayan ang sunog karong panahona.

Matag kapaskohan kusog kaayo ang paggamit sa kuryente tungod sa mnga Christmas lightings ug mga dayan-dayan sa Pasko nga pwedeng ma-overload, duna say daghang mga magpabuto nga posibleng makamugna sab og sunog.

Sumala pa ni Dolot, molibot sila sa mga barangay aron sa pagpahimangno sa mga buhaton sa luwas nga pagsaulog sa Pasko.

Gitug-an ni Dolot, makigtagbo siya sa iyang mga city fire marshals ug provincial fire marshal aron ilang tukion ang mga kalihukan nga maghatag og taas nga kasayuran sa katawhan.

Nagpaabot pa usab sila sa ilang ulohan nga buhatan kung kanus-a nila hingpit isaka ang ilang alert level tibuok Central Visayas. /IBM (BANAT NEWS)