Kontrata tali kapitolyo, Manila Water putlon

CEBU, Philippines — Gihatagan og pagtugot sa Provincial Board si Gob. Gwendolyn Garcia nga putlon ang kontrata tali sa Manila Water Consortium Inc.

Ang Kapitolyo ug MWCI nagtukod og Joint Investment Company (JICO) alang sa bulk water supply sa Metro Cebu gikan sa Luyang River sa Lungsod sa Carmen.

Ang MCWI giingong napakyas sa pagtubag sa notice of breach of contract nga giisyu sa Kapitolyo ngadto sa kompaniya. Apil sa gitumbok nga kalapasan mao ang pagsaka sa project cost o capital expenditure (CAPEX) gikan sa P702 milyones ngadto sa kapin usa ka bilyon ka pesos; pagsaka sa tariff rate gikan sa P13.95 matag cubic meter ngadto sa P24.29 matag cubic meter; pag-ubos sa Project Internal Rate of Return (PIRR) gikan sa 19.23 porsyento ngadto na lang sa P12.30 porsyento.

Si Bokal John Ismael Borgonia ang nangamahan sa resolusyon nga naghatag og katungod kang Garcia sa pagputol sa kontrata.

Matud ni Garcia nga ila pang tukion ang sunod nga lakang sa Kapitolyo diin apil sa gikonsiderar ang pagpalit sa share sa MWCI balor og 80 porsyento sa fair market value.   GMR (BANATNEWS)