Lapu-Lapu adunay 43 ka firecrackers zone

CEBU, Philippines — Ang kagamhanan sa Dakbayan sa Lapu-Lapu nagbutang og lugar diin adto iladlad ang mga baligya nga pabuto.

Si Police Colonel Clarito Baja, city director sa Lapu-Lapu City Police Office (LLCPO) nibutyag nga adunay display area alang sa mga pabuto nga ibaligya subay niining nagkaduol nga kasaulogan sa pasko ug bag-ong tuig.

Nahimutang kini diha sa crossing sa Barangay Canjulao paingon sa Barangay Babag sa maong siyudad.

Matud ni Baja nga matag barangay adunay fire crackers zone diin pasabot niini nga adto pwede magpabuto ug gibana-bana nga niabot sa 43 ang firecrackers zone sa siyudad.

Kadtong makit-an o masakpan nga namaligya og pabuto gawas sa display area dakpon kini ug mapasakaan og kaso.

Nasayran nga adunay mga rekisitos nga kinahanglan sa mga mamaliyga og pabuto sama sa pagbutang sa display area og karatola nga “no smoking”, dunay fire extinguisher,  drum nga adunay tubig ug distansiya usab ang matag stall.

Awhag ni Baja sa katawhan ingon man sa mga mamaligyaay og pabuto nga motuman lang sa balaod.

Kahinumdan nga matag selebrasyon sa pasko ug bag-ong tuig dili mawala ang pabuto tungod kay nahimo na kining kabahin sa tradisyon sa mga Pilipino diin ang uban nagtuo nga pawala usab kini sa demalas.  BDB (BANATNEWS)