Bus nabalintong, 20 pasahero angol
CEBU, Philippines — Naangol ang 20 ka mga pasaherong luwan sa Ceres bus human nga ang ilang gisakyan natagak sa kilid sa karsada ug nabalintong didto sa baybayon sa Barangay Panalipan sa Lungsod sa Catmon.
Si Police Corporal Orven Julius Montuerto sa Catmon Police Station miingon nga nalakip sa mga naangol nga mga mao ang 4 anyos ug 11 anyos nga mga bata.
Ang mga naangol tungod sa naangkong mga bun-og sa ulo ug kalawasan gidala ngadto sa Juan Dosado Memorial Hospital (Sogod District Hospital).
Matud pa ni Montuerto nga base sa ilang imbestigasyon paingon na sa North Bus Terminal sa Dakbayan sa Mandaue ang nahisgotang Ceres bus nga dunay 28 ka mga pasahero nga naglakip na sa drayber ug konduktor niini gikan pa sa Lungsod sa Tabogon.
Si Montuerto miingon samtang nagdagan sa highway nalahos diretso sa walo ka tiil nga pangpang kilid sa karsada ang bus hinungdan sa pagkabalintong niini ug natumba pa ang punoan sa Talisay diha sa lugar. /IBM (BANATNEWS)
- Latest