Mga kapitan sa Mandaue nahadlok?

CEBU, Philippines — Gipadayag sa pipila ka mga barangay kapitan sa Dakbayan sa Mandaue ngadto kang Mayor Jonas Cortes ang mga kabalaka sa ilang seguridad sa nagpadayon karon nilang pagpanghawan sa sidewalks sa ilang lugar.

Lakip sa nipadayag sa iyang kabalaka si Casili Barangay Captain Vidal Cabatingan.

Si Cabatingan niawhag sa presensiya sa mga sakop sa Mandaue City Legal Enforcement Unit (MCLEU) atol sa clearing operations nga ilang ipahigayon aron mao kini ang makig-estorya sa mga maapektohan.

Samtang si Labogon Barangay Captain Amado Manatad nihangyo usab nga kuyogan sila sa kapolisan atol sa mga ipahigayon nila nga clearing operation aron mao kini mobadlong sa mga bayolente nga apektado. Giingong adunay mga residente sa lugar nga apektado sa clearing operation ang mosukol sa task force.

Sa iyang bahin, si Mayor  Cortes nagkanayon nga namatikdan niya nga pipila ka mga  barangay kapitan ang nagpanagana sa pagpatuman  sa kamandoan ni  Presidente Rodrigo Duterte sa paglimpiyo sa sidewalks.

“Kong sige ta og kahadlok, unya naa ta sa katungdanan, maayo pa og mamahuway ta aning politika”, dugang ni Cortes. /BDB (BANATNEWS)