Mga batang kabus gisuroy sa polis

CEBU, Philippines — Gisuroy sa kapolisan sa San Nicolas Police Station ang duha ka managsuon nga batang kabus kagahapon diha sa mga suroyanan sa Dakbayan sa Sugbo.

Kini subay sa “Kid Sagot Kita Program” sa Cebu City Police Office matag pasko isip pinaskohan ngadto sa mga bata.

Sila si Liggen ug Maxel Paden, 8 ug 6-anyos, taga Barangay Suba, Dakbayan sa Sugbo maoy napilian sa San Nicolas Police Station nga hatagan og pinaskohan karong tuiga.

Matud sa hepe sa San Nicolas Police Station Police Major Keneth Paul Albotra nga ang inahan sa duha walay trabaho gani wala makaeskwela ang maong mga bata.

Si Albotra nagkanayon nga ang pasko alang kini sa mga bata ug buot nila nga makasinati ang maong mga bata bisan sa unang higayon sa mga butang sama sa pagduwa diha sa mga amusement park.

Gawas niini gipalitan usab sa kapolisan og noche buena ug gipakaon og mga lamiang pagkaon ang managsuon.

Ikaduha kini nga higayon karong tuiga diin adunay mga bata nga gisuroy isip pinaskohan ngadto sa mga batang kabus sa Cebu City Police Office (CCPO). —/BDB BANAT NEWS