Prayoridad sa barangay tan-awon ni Gwen

CEBU, Philippines – Mopagawas na og lagda si Gobernador Gwendolyn Garcia kun unsay mahatag sa Kapitolyo nga hinabang ngadto sa mga barangay.

Nabantayan sa gobernador nga adunay ubay-ubay nga gipangayo ang mga barangay sa Probinsiya sa Sugbo nga tan-aw niya dili na kinahanglan pa nga ang Kapitolyo ang mohatag ilabi na kun dato nga barangay.

“This is my pronouncement now, I will come up with a set of guidelines, unsa ra ang pwede nato matabang sa mga barangay kay mura’g nakita nako in the past bisa’g unsa na lang pangayoon gikan sa bola ngadto sa medalya ngadto sa uniporme kulang na lang mangayo og singsing. It’s really crazy, pati pa tents,” matud ni Garcia.

Matud ni Garcia nga dili na mohatag pa ang Kapitolyo og mono block chairs ug ingon man tulda. Sumala sa gobernador nga ang guidelines mosubay kini sa kinahanglan gyud sa barangay ug magdepende sa kadaku ug kagamay niini.

Iyang nasayran nga adunay ubang barangay dili mogasto sa proyekto ug adto na lang sa Kapitolyo mangayo tungod kay ang kwarta pondohon aron himoon nga bonus sa mga opisyal sa barangay.

“Pagastoha ng barangay kay kana man gud dili nila magamit sa barangay, ang ilang budget mahimong bonus at the end of the year. Nya kinsa ra man makadawat? Kato ra naay bonus? Unya ang mga tawo nga maglisud og agi sa dalan?" matud ni Garcia.

Iya kining ipahibawo sa mga opisyal sa barangay atol sa tigum sa mga opisyal sa Disyembre 10 diin iyang klarohon nga dili kinahanglan ang Kapitolyo ang tanan mohatag sa unsay pangayoon sa barangay ilabi na kun makaya ra sa budget niini.

“I will come up with a set of guidelines that will ensure transparency, accountability and most of all that will ensure the efficient use of our resources. Dili nga gasto kay gasto lang ta bisag unsa na lang kay modagan ta’g position, nya iyawat na lang nga mobotar nato,” matud ni Garcia.

Dugang niya nga pagpanalipod usab kini sa mga bokal nga dili kabalibad kun unsay pangayoon sa mga barangay sa ilang mga mga distrito. /GMR (BANAT NEWS)