Mga atletang Talisaynon sa SEA Games pasidunggan

CEBU, Philippines — Si Mayor Gerald Anthony “Samsam” Gullas, Jr. sa Siyudad sa Talisay nipadayag sa iyang dakong garbo nga adunay tulo ka Talisaynon nga nisalmot sa South East Asian (SEA) Games didto sa kaulohan.

Si Gullas nipaabot dayon kini sa iyang pasidungog ngadto kang Kim Andrew Remolino kinsa nakakuha og silver medal sa duwa nga triathlon.

Samtang si Larry Avila kinsa moduwa sa shooting metallic silhouette ang mopakita pa sa iyang abilidad. Bisan og wala madayon si Roger Ray Pogoy sa Gilas Pilipinas gumikan sa iyang injury hatagan gihapon kini og pasidungog sa siyudad.

Ang mga atletang nadala sa SEA Games pulos kini taga Barangay Cansojong.

Si Gullas nibutyag nga iyang pakig-estoryahan niya ang konseho aron hatagan og bili ang nabuhat sa tulo ka atleta nga nihatag og dungog sa Dakbayan sa Talisay. Dugang ni Gullas nga usa kini sa mga butang nga ilang ipadayon nga mao ang pagpalambo sa programa sa paugnat sa kusog. (Gabriel C. Bonjoc/BDB)

Millennial dili kaagwanta og pressure sa trabaho?

Mga millennial nga trabahante dili kaayo makasugakod og pressure sa ilang mga kasamtangan nga trabaho.

Kini ang gitug-an sa magpapatigayon nga si Philip Tan kinsa sakop usab sa Regional Tripartite and Productivity Board nga nahinabi sa Banat News.

Matud ni Tan nga problema karon ang labor sector ilabi na sa mga millennial tungod kay dili kini makadawat og pressure sa ilang mga trabaho hinungdan nga kasagaran kanila ang dali nga mangundang.

Giingong bisan sa Business Process Outsourcing problema usab tungod kay walay magdugay nga mga batan-on dali nga mangundang sa kasamtangang trabaho ug mangita og laing trabaho.

Si Tan nagkanayon nga daghan karon sa mga trabahante ang nangita og dakong sweldo ug sayon nga trabaho dili sama kaniadto sa ilang panahon nga kinahanglan sila nga motrabaho pag-ayo.

Awhag ni Tan ngadto sa mga nagpangita og trabaho nga unta dili lang pulos atubang sa social media ang himuon ug wala na hinuoy lihok nga mahimo ug makagasto pa og dako tungod kay sigurohon man ang pang-load sa gadget. (/BDB)(BANATNEWS)