Kanhi traffic enforcer nadasmagan patay
CEBU, Philippines — Patay ang kanhi traffic enforcer human kini nadasmagan sa naghaguros nga motorsiklo alas 7 pasado niadtong Lunes sa gabii sa M.C Briones St., Guizo, Siyudad sa Mandaue.
Ang biktima mao si Benjie Ruales, 57, dalaga nga taga Sitio Marpha, Bakilid sa maong siyudad, samtang ang nakadasmag nga motorsiklo gimaneho ni Jessan Tabudlong, 26, taga Jugan, Consolacion.
Matud ni Police Lieutenant Colonel Franco Rudolf Oriol, hepe sa Mandaue City Traffic Group, nga nitabok sa karsada ang biktima dihang nabanggan sa motorsiklo hinungdan sa pagpantok sa ulo sa karsada.
Ang biktima nakaangkon og grabeng kadaut ug bun-og sa nagkadaiyang parte sa kalawasan.
Dali kining gidala sa duol nga tambalanan apan gideklarar nga dead on arrival samtang si Tabudlong sigun pa ni Oriol ang anaa sab sa talandugon nga kahimtang ug kasamtangang giatiman sa mga doktor. Sigun ni Oriol nga posibleng mag-atubang og kaso ang suspek. (/GMR)(BANATNEWS)
- Latest