Polis: Manguha’g internal organs, fake news

CEBU, Philippines — Mga nanggawas nga post sa social media bahin sa mga managit og bata ug mga tawo nga pugsanong pasakyon sa puti nga van nakapabalaka sa publiko, apan ang kapolisan mihulagway niini nga fake news.

Si Police Lieutenant Colonel Maribel Getigan, hepe sa Danao City Police Station miingon nga fake news kining mga nag-viral nga video diha sa social media nga gi-post sa usa ka netizen bahin sa puti nga van nga naka park sa dalan kansang mga sakay wala siya makaila.

Matud pa ni Getigan nga sa post sa netizen nipadayag kini og pagduda sa mga sakay kay mga pahumot ang baligya niini.

Tungod kay duna say laing nag-viral video sa social media bahin sa usa ka patay’ng lawas nga giablihan ang lawas ug gipangkuhaan og ginhawaan, nahadlok ang maong netizen.

Matud pang Getigan ilang gisusi ang dapit diin nakita ang puti nga van apan dili kini tinuod. Gipatawag ni Getigan ang nag-post sa Facebook ug kini giingong miangkong hinimo-himo ra niya kini.

Samtang ang Cebu City Police Office (CCPO) mipasaliga nga walay angay ikabalaka niining mga report nga adunay managhit og tawo nga manguha og internal organs.

Si CCPO Officer in charge Police Colonel Geovanie Maines miingon nga wala silay na-monitor nga ingon niini nga mga kaso dinhi. Apan siya mipasidaan sa mga ginikanan nga mahimong responsable pagbantay sa ilang mga anak ug dili basta isalig ni bisan kinsa ug tudloan ang mga bata sa  pagmatngon.  /IBM (BANATNEWS)