Guwardiya naniid sa kawatan naunay sa armas

CEBU, Philippines —  Naunay ang usa ka guwardiya sa iyang armas samtang siya naghinay-hinay sa pagdakop unta sa mga kawatan nga nisulod sa iyang gibantayan nga kompaniya sa San Roque, Dakbayan sa Talisay kagahapon sa kaadlawon.

Samdan sa iyang tuo nga tiil si Joveniel Hawom, 28-anyos, lumad nga taga Zamboanga del Sur nga nagpuyo sa maong lugar.

Si Hawom sakop sa MJS Security Agency nga nagbantay sa Auto Mazo Surplus.

Sa inisyal nga imbestigasyon sa kapolisan nasuta nga nagpahigayon og roving si Hawom sa iyang gibantayan nga establisemento.

Nabantayan ni Hawom nga adunay mga tawo nga nisulod sa opisina hinungdan nga hinay-hinay siya nga nipaduol niini.

Apan ang iyang shotgun naigo sa iyang tuhod ug nikalit pagbuto tumong sa iyang tuo nga tiil.

Pwerte sab nga kurata sa mga kawatan sa pagtuo nga sila na ang gipusil.

Dali nga nidagan ang mga kawatan samtang si Hawom ang nahiagom og samad pinusilan.

Gidali pagdala sa tambalanan si Hawom samtang gipasurender ang iyang armas sa awtoridad samtang giproseso pa ang pagsuta sa mga papeles niini.  GMR (FREEMAN)