Paglimpyo sa Bulacao River gitabangan

CEBU, Philippines — Nagtinabangay ang Siyudad sa Sugbo ug Talisay sa paglimpyo sa Bulacao River nga maoy nag-uwang sa duha ka siyudad. Mismo sila si Cebu City Mayor Edgardo Labella ug Talisay City Mayor Gerald Anthony Gullas Jr. ang nangulo sa pagpanglimpyo.

Una na nga gideklarar sa Environmental Management Bureau ang sapa nga patay na. Matud ni Gullas nga ang pagpakita sa mga tawo nga ang gobiyerno andam nga manglimpyo mao ang una nga hugna sa tulo ka hugna nga agenda sa mga solusyon alang sa kalimpyo.

“Second phase will be right legislation, nga kung naa na pud molabay utro naa nay penal, and ang third kay manakop na gyud ta,” matud ni Gullas. Gipaambit sab ni Labella nga ang paglimpyo usa ka paningkamot sa duha ka siyudad aron magtinabangay sa usa’g usa.

“We will continue to reach out with the other. Because no man is an island, dili gyud na mahimo na dili ta magkuyog kay inig baha sa Talisay, dili man sab mahitabo na mohunong lang sa Talisay moabot man gyud na sa Sugbo ug ang traffic didto dili man sab mahimo na dili moabot sa mopadulong sa south,” matud ni Labella.  Ang Department of Public Works and Highways magbutang og paril sa mga taytayan aron mapugngan ang mga tawo nga ilabay ang ilang basura sa sapa sa Bulacao. – BANAT NEWS