‘Pusher’ gitulis, gipatay

CEBU, Philippines — Gipasanginlang drug pusher gitulis ug gipatay sa upat sa lima ka mga gipasanginlang adis-adis kay wala niya hatagi og shabu diha sa Barangay Lagtang, Dakbayan sa Talisay niadtong Miyerkules sa hapon.

Ang biktima giila sa kapolisan nga si Juniel Cabiluna nga taga Barangay Jaclupan sa maong siyudad.

Ang mga operatiba sa Talisay City Police Station unang nakadakop ni Jener Bacus, 35, nagpuyo sa maong lugar human siya nakuhaan og ilegal nga drugas sa gipahigayong buy bust operation. Nakuha sab niya ang .38 nga revolver nga dunay mga bala.

Wa magdugay nadakpan sab si Xavier Jason Cabier, 30. Nakuhaan sab siya og ilegal nga drugas ingon man usa ka revolver nga walay dokumento.

Wa sab magdugay nadakpan sila si Areen Calinawan ug Rommel Bacacao sa gihimo nga hot pursuit operation human sila gitumbok sab sa maong krimen. Samtang gipangita pa karon sa kapolisan ang usa ka Christopher Anyol nga giingong nakaikyas ug nagtagotago.

Matud pa ni Police Major Gerard Ace Pelare, pangu sa Talisay City Police Station nga nangayo ang mga suspek sa biktima og shabu apan ang nagmagahi kini sa paghatag hangtud nga ila kining gipatay. Usa ka saksi sa lugar ang nakakita sa panghitabo hinungdan nga nabulabog ang gihimo sa mga suspetsado.

Gikaingon nga bag-o pang namaligya og drugas si Cabiluna maong wala pa kaayoy impormasyon ang kapolisan kun kang kinsa gikan ang ilegal nga drugas nga gibaligya niini.Apan si Bacus nihimakak sa krimen ug siya mitug-an nga nisibat siya palayo sa grupo sa dihang gipatay ang biktima.

Apan sumala pa sa kapolisan nga grupo sa mga tulisan ug kawatan ang maong mga suspetsado. Gawas pa sa paggamit og illegal nga drugas mga guns for hire sab ang grupo.

Kagahapon sa buntag si Mayor Gerald Anthony “Samsam” Gullas Jr. personal nga nagpasalamat ni Pelare sa dinalian nga kasulbaran sa krimen. IBM (BANAT NEWS)