Kaso sa dengue sa Central Visayas nisaka diin 133 na ang patay

CEBU, Philippines — Gikatahong niabot na ngadto sa 26,253 ang kaso sa Dengue diin 133 niini ang patay

 sa Central Visayas kini base sa datos sa Regional Epidemiology and Surveillance Unit (RESU) sa Department of Health (DOH)-7.

Ang maong gidaghanon sa kaso nisaka kini og 49 porsyento itandi sa samang gidugayon sa niagi nga tuig nga naa lang sa 17,595 ang kaso ug 104 ang patay.

Giingong kasagaran sa mga naapektohan sa maong sakit nagpangedaron og 6-anyos ngadto sa 10-anyos ug kadaghanan niini mga lalaki.

Ang top 10 nga mga lugar sa Central Visayas nga daghang kaso sa dengue gilangkuban sa Cebu City, Lapu-Lapu City, Mandaue City, Dumaguete City, City of Naga, Danao City, Talisay City, Minglanilla, Tagbilaran City ug Toledo City.

Base sa talaan sa RESU nga niabot ngadto sa 3,070 ang kaso sa dengue sa Cebu City ug 20 ang patay; sa Lapu-Lapu City adunay 1,427 ug tulo ang patay; Mandaue City adunay 944 ug upat ang patay; Dumaguete City niabot sa 808 ug usa ang patay; City of Naga adunay 746 ka kaso ug usa ang patay.

Samtang sa Danao City adunay 679 ka kaso; Talisay City adunay 612 ka kaso ug upat ang patay; Lungsod sa Minglanilla adunay 531 ka kaso ug usa and patay; Tagbilaran City adunay 451 ka kaso ug walo ang patay ug Toledo City adunay 438 ka kaso ug upat ang patay.

Ang DOH kanunay kining nipahimangno sa publiko nga manglimpiyo kanunay sa palibot diin kadtong mga buntang nga mapundohan og tubig hiposon kini aron dili itlogan sa mga lamok. BDB (BANAT NEWS)