Operation di mag-agad kinsay anti-drug czar

CEBU, Philippines — Gipasalig sa Cebu City Police Office nga dili makaapekto sa kampanya batok sa ilegal nga drugas bisan kinsa ang mangulo sa drug war sa Inter-Agency Committee Against Illegal Drugs.

Kini human gitaktak ni Presidente Rodrigo Duterte si Bise Presidenti Leni Robredo isip co-chairman sa ICAD.

Matud sa hepe sa City Intelligence Branch sa CCPO, Police Major Randy Caballes nga ang kapolisan dili manginlabot kung kinsa ang molingkod sa pwesto tungod kay magpadayon gihapon ang ilang mga operasyon. Sa pagkakaron adunay mga bag-ong drug personalities ang gipaubos sa monitoring human nitumaw ang ilang mga pangalan.

Niining bag-o lang, kapin sa P1.3 milyones nga balor sa shabu ang nasakmit sa gipahigayong buy-bust operation sa CIB ug City Drug Enforcement Unit.

Mokabat sa P1 milyon ang balor sa shabu nga nasakmit sa may dalan Concepcion, Barangay Suba, Dakbayan sa Sugbo diin nadakpan ang usa ka Leo Labador, 35, lumad nga taga Probinsiya sa Negros Occidental.

Taud-taud na nga gi-monitor ang pagpamaligya ni Labador sa Barangay Suba ug giingong makapamaligya pa kini sa mga silingan nga barangay.

Lain usab nga operasyon ang gipahigayon sa CIB sa may dalan Avocado, Barangay Mambaling, Dakbayan sa Sugbo.

Giila ang mga dinakpan nga sila si Renante Matas alyas Totong, 36, ug Jay Abella, 36, nagpuyo sa maong lugar, kinsa kapin sa usa ka semana nga gi-monitor.

Matud pa nga makabaligya og 80 ngadto sa 100 gramos matag semana si Totong kinsa mao usab ang subject sa gipahigayon nga buy-bust operation.

Nasakmit gikan sa ilang posisyon mao ang 32.5 gramos nga shabu nga mokabat sa P222 mil.

Samtang mokabat sa P470 mil nga balor sa ginadiling drugas ang nasakmit gikan sa duha ka dinakpan sa buy-bust operation sa Sitio Hinulawan, Barangay Poblacion, Toledo City niadtong Martes sa hapon.

Ang nasikop naila nga sila si Erica Poloyapoy, 45, high-value target, walay trabaho ug Wilber Poloyapoy, 51, construction worker ug puros residente sa maong lugar.

Nipahigayon sa maong buy-bust ang Drug Enforcement Team sa Toledo City Police Station ubos ni Police Lt. Col. Janette Rafter batok sa maong mga dinakpan.

Nasakmit gikan sa mga dinakpan ang mga pinutos sa ginadili nga drugas nga motimbang og 70 gramos nga mobalor og P476 mil ug P3,000 nga gituohang halin, cellphone ug timbangan. GMR (BANAT NEWS)