Natagak sa atabay patay

CEBU, Philippines — Usa ka 15 anyos nga babaye ang napalgang patay sa ilawom sa atabay diha sa Barangay Tinubdan, lungsod sa Daanbantayan.

Giila ang namatay nga si Maria Kristina Sophia Mercader nga nagpuyo sa maong lugar.

Matud ni Daanbantayan chief Police Captain Ian Macatangay nga  ang  pamilya sa dalagita nitug-an nga  pasado alas 6 sa hapon niadtong Lunes naglaba kini luyo sa ilang balay.

Samtang naghayhay na si Mercader sa iyang mga nilabhan nalipat kini ug wala mabantayi nga adunay tabay nga walay takob duol sa hayhayan ug nahulog kini didto.

Nagduda na ang pamilya kay taud-taod na kini wala mabalik sa ilang panimalay maong nagtinabangay sila sa pagpangita hangtud nakit-an ang iyang tsinelas ug cellphone sa gawas sa tabay.

Tungod sa pagdudang basin nahulog kini sa atabay nitawag sila sa kapolisan, Bureau of Fire and Protection (BFP) Local Risk Reduction Management Office (MDRRMO) sa lungsod sa Daanbantayan.

Nakuha ang lawas sa biktima alas 12 sa Martes ug dali kini nga gidala sa tambalanan apan gideklarar nga dead on arrival. (/IBM)(BANATNEWS)