CCPO, PDEA makadawat sa allowance gikan sa CH

CEBU, Philippines — Giaprobahan sa konseho sa Siyudad sa Sugbo ang hangyo sa Cebu City Police Office ug Philippine Drug Enforcement Agency nga i-retroact ang paghatag sa mga allowances sa ilang mga personahe.

Ang niagi nga administrasyon nipahunong sa paghatag sa mga allowances sa CCPO niadtong Pebrero 2019 ug ang PDEA niadtong Enero 2019.

Sayo niini ang resolusyon ni Konsehal Philip Zafra ug Konsehal Raymond Garcia gi-refer sa City Legal Office (CLO) alang sa dugang legal nga opinyon aron mahatag ang mga retroactive allowances sa mga ahensya labi na sa niaging mga buwan.

Matud sa CLO nga ang kagamhanan sa siyudad mahimong mohatag og mga allowances sa CCPO ug PDEA subay sa balaud.

Nunot niini matud sa CLO nga walay babag sa balaud ang paghatag og allowances sa maong mga buhatan basta ang lokal nga kagamhanan adunay igong pondo ug ordinansa sa maong katuyoan.

Hinoon giklaro sa resoluyon nga adunay pondo nga adto kuhaon ang allowances ubos sa Peace and Order Program karong tuig 2019.

Madawat sa CCPO ang ilang mga allowances sukad Pebrero hangtud Hunyo 2019 ug ang PDEA makadawat usab sa ilang allowances sa Enero hangtud Hunyo 2019. /GMR (BANATNEWS)