Seguridad sa Sinulog 2020 gipangandaman

CEBU, Philippines – Gipangandaman na sa Cebu City Police Office ug kagamhanan sa Siyudad sa Sugbo ang seguridad sa umaabot Sinulog 2020.

Nagtagbo na ang Task Force Sinulog 2020 nga gipangulohan ni Police Regional Office 7 Deputy Regional Director for Operation ug CCPO officer-in-charge, Police Colonel Geovanie Maines.

Matud ni Maines nga mokabat sa usa ka libo ka polis sa Central Visayas ang ipakatap atol sa Sinulog. Motabang sab ang kasundaluhan ug mga lokal nga kagamhanan Siyudad sa Sugbo, Lapu-Lapu ug Mandaue.

Lakip sa nitambong sa tigum ang kadagkuan sa Sinulog Foundation Inc., Philippine Navy, Task Force Cebu ug uban pa nga nalambigit sa kalihukan sa Sinulog.

Samtang sa laing bahin, tinguha sa Cebu City Transportation Office ug CCPO nga magtinabangay sa pag-alarma kung adunay bangga.

Gibutyag usab ni Maines nga mohimo una siya og pagsusi sa Legal, ug sa CCPO Traffic Patrol Group kung unsa ang angayan nga lakang nga buhaton subay sa tinguha nila nga paspas nga imbestigasyon ug pag-alarma sa bangga sa kadalanan. (/GMR)(BANAT NEWS)