Konsiyerto alang sa Cotabato

CEBU, Philippines — Usa ka konsiyerto nga gitawag og “Tabang Cotabato, Music & Love for Our Countrymen” ang himoon sa Plaza Independencia sa Dakbayan sa Sugbo aron sa pagdugang sa tabang sa mga biktima sa linog sa Cotabato karong Sabado.

Kini hiniusang kalihukan sa 1901st Infantry Brigade, Sangguniang Panlungsod, Qualfon ug sa 14 ka mga banda.

Si Brigadier General Erik Espina, brigade commander sa 1901st IB Ready Reserve, nibutyag nga tanang matigum nga kwarta ug mga kagamitan itugyan ngadto sa Central Command sa Armed Forces of the Philippines kinsa mao na sab ang mohatud ug mohatag sa mga donasyon.

“It’s a free concert but please bring one peso, or ten pesos, or one bottle water. We are giving a chance to every Cebuano to be able to contribute and help the people in Cotabato and other parts na na-igo sa linog,” matud ni Espina.

Dul-an sa 30 ka banda sa musika ang nagboluntaryo nga moapil apan tungod sa limitado nga oras, 14 lang ang napili nga mao ang Missing Filemon, Powerspoonz, Intertwined, Cuarenta, PG18, Johnnie & The Walkers, Ukemia, Brownskin Riddim, Miracle Facts, Keraro, Jerico, Benny Rock, Kobe, and Krizzia Sayson.

“Gi-awhag nato tanan kabatan-onan you are all welcome to join the concert bring your family, it’s a time to celebrate! There is a silver lining in disasters, you know why? It brings the best out of all of us,” matud ni Espina.

Samtang mga young artist sa Sugbo diin kadaghanan mga tinun-an sa Cebu Technological University niawhag sa kabataan ilabi na kadtong adunay mga talento sa pagdibuho sa pagpadayon ug dili himoong babag ang kalisud.

Kini sumala pa sa mga sakop sa Sugid Alampat, grupo sa mga batan-on nga Sugbuanong artist kinsang tumong ug tuyo nagdasig sa kabatan-onan sa pag himo sa art isip ilang outlet sa ilang mga pagbati.

Ang art exhibit gitawag kini ug “GAMA: Youth, Diversity and Expression” karong Nobiyembre 25 hangtud sa Disyembre 1 sa 3rd Floor sa Robinson Galleria Cebu.

Tumong ug tuyo sa maong art exhibit ang pagpakita sa mga talento sa mga young artist kung diin ang kita sa ilang mga painting alang kini sa ilang mga activity para sa pagtabang sa kabataan nga mas labing nanginahanglan.

Atol sa maong exhibit mahimo usab sila manawat og mga donasyon sama sa mga gamitan sa painting para sa mga out-of-school youth nga adunay talento sa art.

Si Kean Larrazabal, founder sa Sugid Alampat ug founder sa Guild of Iligan Young Artist, nitug-an nga angay dili magduha-duha ang kabatan-onan sa pagpadayon sa ilang talento ilabi na kung mahiligon sila sa arts.

Dugang ni Larrazabal nga angay sab ang gobiyerno mosuporta sa tanang local artist ilabi na ngadto sa mga magtutudlo nga palig-onon pa ang paghatag og panahon sa art.

Si Professor Grace Gay Cabellon nga maoy nagtabang ug nag-agak sa maong mga young artist nitug-an nga maoy tinguha niya nga molambo pa ang maong mga artists ug mopaambit niini ngadto sa mga nagkadaiyang hut-ong sa katilingban sama sa street children, mga tawong adunay kabilinggan ug uban pa.

Awhag ni Cabellon sa katawhan nga suportahan ang kabataang artist sa ilang unang higayon nga exhibit ug sa umaabot pa nila nga kalihukan. (/GMR)(BANATNEWS)