Mogamit og vape sa publikong lugar dakpon

CEBU, Philippines — Andam ang kapolisan sa Police Regional Office 7 sa pagdakop sa mga mogamit og e-cigarette kon mas nailhan nga vape sa pangpublikong lugar base sa direktiba ni Presidente Rodrigo Duterte.

Matud ni PRO-7 Regional Director Valeriano de Leon nga iyang gihatagan og direktiba ang kapolisan sa Central Visayas nga mangdakop ug sakmiton ang vape sa mga pangpublikong lugar.

“I am ordering my men to arrest those who will smoke e-cigarettes and confiscate vapes in public places in Central Visayas region,” matud ni De Leon.

Subay niini nimando dayon si Cebu Provincial Police Office Director Rhoderick Mariano sa pagpatuman sa kamanduan dungan ang pahimangno ngadto sa mga namaligya og vape.

Samtang sa Cebu City Police Office gisugdan na sab pag-inspeksyon ang mga tindahan og vape.

Dili sab magpanuko sa pagdakop ang kapolisan sa Dakbayan sa Talisay sa mga tawo nga maggamit og vape sa pangpublikong lugar.

Matud ni Police Major Gerard Ace Pelare, hepe sa Talisay City Police Station, nga ilang ipatuman ang istrikto nga kamanduan ni Duterte.

“The directive, once we receive the memo, is for their own good and the public, so they better adhere to the new directive of the President because will implement it strictly,” nagkanayon si Pelare.

Alang niya dili maayong supakon sa katawhan ang kamanduan aron dili mahasol sa umaabot nga mga adlaw kay sila sa ilang bahin mao man ang mopatuman niini.

Si Duterte nipagawas og kamanduan nga dakpon ang maggamit og vape tungod kay makadaut kini sa panglawas.

Gihangop sa Department of Social Welfare and Development ug Department of Education ang maong kamanduan.

Matud ni Dr. Marilyn Miranda, education program supervisor sa Curriculum Learning Management Division sa DepEd-7, nga pabor kaayo siya sa kamanduan sa Presidente tungod kay para kini sa kaayuhan sa mga bata.

Sumala pa ni Miranda nga “sensitive” ang immune system sa kabataan maong tukma lang ang desisyon sa Presidente sa pagpahunong niini aron mahatagan og importansya ang panglawas sa mga batan-on tungod kay “health is wealth.”

Samtang si Cynthia Bersabal, technical staff sa Regional Council for the Welfare of Children 7, pabor usab kaayo sa tinguha sa Presidente tungod kay ang pagpanigarilyo dili man makaayo sa panglawas ilabi na sa kabataan.

Dugang pa ni Bersabal nga daku kaayo og impact ang kamanduan sa Presidente ilabi na karong buwan sa kaba taan. (/GMR)(BANATNEWS)