Cellphone gipalukat, naglabni sikop

CEBU, Philippines — Nadakpan sa entrapment operation sa kapolisan sa Lungsod sa Cordova ang usa ka tawo nga nagtinguha sa pag-uli sa gilabni niining cellphone sa niaging semana sa dalan Centennial Road sa Barangay Alegria.

Si Police Lieutenant Jan Ace Elcid Layug nga maoy hepe sa Cordova Police Station niila sa nadakpan nga si Rennie Inoc Ybañez, 21, taga Barangay Babag II, Dakbayan sa Lapu-Lapu.

Matud ni Layug nga nakig-text ang suspek tag-iya sa cellphone nga iya kining iuli bugti sa kantidad nga ibayad hinungdan sa pagdangop sa biktima sa kapolisan.

Nagkasabot ang biktima ug suspek nga magkita apan maoy iyang gikatagbo ang mga polis hinungdan sa iyang pagkasikop.

Nakuha pagbalik ang cellphone sa biktima ug ingon man kalibre .38 nga armas nga dala sa suspek. GMR (BANAT NEWS)