Nanunggab sa inahan napusilan

CEBU, Philippines — Naangol ang 27-anyos nga lalaki nga nanunggab sa iyang inahan sa niaging adlaw sa Barangay Cubacub, Dakbayan sa Mandaue human napusili sa tuhod sa nialarma nga mga polis.

Ang napusilan mao si Racky Bacang, taga Purok 6, Barangay Cubacub samtang ang inahan nga iyang gidunggab mao si Judith Bacang.

Sumala pa ni Police Staff Sergeant Jodelmar Pones nga si Racky naggunit pa sa kutsilyo dihang nahidangat ang mga polis sa maong dapit.

Gihangyo ang suspek sa pagtahan sa iyang kutsilyo apan giingong wala gyud nanumbaling ug nibunot hinoon sa giloklok nga armas nga maoy nakaaghat sa polis sa pagpusil sa iyang tuhod hinungdan sa pagkalandig sa tambalanan. GMR (BANAT NEWS)