Multicab nasampak sa kahoy, usa patay

CEBU, Philippines — Patay ang usa ka call center agent, samtang kritikal ang drayber ug samdan ang lain pang mga pasahero sa usa ka multicab nga nisampak sa punoan sa kahoy sa Transcentral Hi-way, Upper Garahe Barangay Busay, Dakbayan sa Sugbo.

Giila ang namatay mao si Roy Vincent Talamor,32, taga Barangay Kasambagan, Dakbayan sa Sugbo kinsa tupad sa drayber nga si Dashiell Antipuesto, 25, taga Santo Niño Street, Barangay Hipodromo.

Sakay sa maong Suzuki multicab canopy pick-up nga pulos sab nangaangol mao sila si Apple Nagca, 24,  taga Barangay Carreta; Jane Francis Rosell, 27, taga  Barangay Hipodromo; Ferliz Mae Fajardo, 23, taga Tucoran, Zamboanga Del Sur, ug Carla Louise Songalia, 23, taga Estocada St., Poblacion, Kapatagan, Lanao Del Norte.

Matud pa ni Police Staff Sergeant Venerando Bacalso Jr., Traffic Investigator sa Mabolo Police Station, gikan sa Tops sa Barangay Busay ang mga biktima.

Sa dihang padulhog na sa kurbadahong bahin sa lugar padulong sa Barangay Lahug ang multicab nawagtangan og control ang drayber ug nilayat sa kanal ang sakyanan dayon nabangga sa punoan sa kahoy.

Tungod sa kakusog sa pagbangga nangalagpot ang pasahero niini ug didto nitugpa sa dalan. Sumala pa ni Bacalso, gidala ang mga biktima sa tambalanan ug didto na gideklarar si Talamor nga dead on arrival samtang si Antipuesto kritikal ang kahimtang. Padayon pa ang imbestigasyon sa kapulisan may kalabutan sa maong insidente. IBM (BANAT NEWS)