SFI di makakupot sa P35 milyong gikan sa CH
CEBU, Philippines — Dili ihatag ngadto sa Sinulog Foundation Inc. ang P35 milyones nga gahin sa kagamhanan sa Dakbayan sa Sugbo alang sa kalihukan sa Sinulog.
Kini sumala pa ni Cebu City Vice Mayor Michael Rama kinsa bag-o lang niluwat isip chairman sa SFI.
Matud ni Rama nga natuki kini atol sa 2020 budget hearing niadtong Lunes.
Dugang pa niya nga sukad sa 2009 ang Commission on Audit dili na mosugot nga mohatag ang kagamhanan sa siyudad og ayuda sa usa ka pribadong grupo kung wala’y disbursing officer.
“But most of the time, kay usahay ang approval dugay kaayo, ang SFI maoy motapal. Kung dili man gani, mo-advance. That is actually the picture,” sigun ni Rama.
Nunot niini si Rama niingon nga nawala na ang check and balance tali sa executive ug legislative department.
“There’s no such thing as check and balance because there is no balance to the check and there is no amount to be checked. Because this P35 million will never be received by the Sinulog Foundation,” matud ni Rama.
Giklaro usab sa bise mayor nga ang SFI usa ka independenteng non-government organization ug dili angay mandoan.
Giingon ni Rama nga sa kapin 30 ka tuig na sa SFI, wala usab kini mapaubos sa usa ka board sama sa gimugna ni Mayor Edgardo Labella nga Sinulog Governing Board. GMR (BANAT NEWS)
- Latest
