Opisina sa LTO sa Balamban giablihan

CEBU, Philippines — Gibuksan na ang Land Transportation Office Licensing Extension sa Lungsod sa Balamban.

Kini aron makatabang sa mga aplikante og driver’s license sa kasadpang bahin sa Lalawigan sa Sugbo sama sa mga lungsod sa Tabuelan, Tuburan, Asturias, Balamban, Barili ug Dakbayan sa Toledo.

Ang soft opening kagahapon gitambongan nilang Balamban Mayor Alex Binghay, Bise Mayor Alex Francis Binghay II, mga konsehal, LTO-7 Regional Director Victor Emmanuel Caindec, kadagkuan sa Stradcom ug mga LTO private partners sama sa SJ Aguanta Medical Services.

Ang Licensing Extension Office mosilbi sa tanan licensing transactions sama sa issuance of student permits, new license, renewal of driver's license, dormant application, revision sa records, additional code, change classification gikan sa non-professional ngadto sa professional, duplication sa license ug conversion sa foreign license.

Ang LTO sa Balamban ang ikaunom nga buhatan nga giablihan karong tuiga samgang duna pay laing lima nga ablihan karong tuiga. GMR (BANATNEWS)