HFG sa DSWD nagsaulog sa ilang ika-25 ka tuig nga pagtabang sa kababayen-an

CEBU, Philippines — Gisaulog sa Home for Girls sa Department of Social Welfare and Development-7 ang ika-25 nga kasumaran niini sukad sa ilang pagtabang sa mga kababayen-ang biktima sa pagpangabuso ug eksploytasyon.

Sumala pa sa DSWD-7 karong bulana sa Nobiyembre 2019 duna nay 93 ka mga kababayen-ang biktima o survivors sa pagpangabuso, pagdagmal, ug eksploytasyon ang gipasilong diha sa HFG-Labangon sa Dakbayan sa Sugbo.

Inanay ug pinahimutang ang proseso nga giagian sa mga survivors aron mabalik ilang kompiyansa sa kaugalingon ug makabangon gikan sa pait nilang kasinatian gikan sa mga miabusar kanila. Ang mga biktima gitabangan sa mga registered social workers ug mga staff sa maong sentro.

Ang paghandom sa kasumaran sa maong buhatan nagsilbi sab nga paagi sa DSWD aron mapasalamatan ang mga nagkadaiyang grupo, ahensya ug uban pa nga dako og papel sa pagtabang sa mga biktima.

Pinaagi sa maong kalihokan nahatagan og pasidungog ug giila ang matag stakeholder sa ilang tagsatagsa ka mga natabang nila sa mga biktima aron mabalik sila sa ilang mga pamilya ug nirmal nga kinabuhi.

Si Paglaum Training International (PTI) Director Jonna P. Eleccion kinsa maoy pinasidunggang dinapit miingon nga duna sab silay nakat-onan sa pagpadagan sa Home for Girls tungod kay nakita nila didto ang mga pamaagi sa pagplano ug pagpataas sa kalidad sa serbisyo sa ilang organisasyon.

“With the technical staff of the Home for Girls we were able to operationalize a reintegration support program that offers economic empowerment services to girls and women who are reintegrated back to their communities after a period of time in shelters,” si Eleccion miingon.

Gipasabot sab niya nga dili lang ang gobiyerno ang dunay papel nga natabangan kining maong mga biktima tungod kay hasta ang katilingban nakatampo sab sa kausaban.

Usa sa mga survivors nga natabangan sa maong sentro kinsa biktima sa cybercrime ug na-rescue diha sa iyang eskuylahan niadtong 2018 mitambag sa mga kababayen-ang nipasilong karon sa maong sentro sa pagtuman sa mga pahimangno sa mga staff ug social workers kay mao lang kini ang pamaagi aron sila matabangan ug masubay sa hustong dalan kun gusto silang mabalik sa katilingban.

Niadto lang buwan sa Abril ning tuiga siya nakagawas sa sentro ug karon usa n aka regular nga empleyado sa usa ka kompanya. (/IBM)