Garbo Festival 2019 mabulokon

CEBU, Philippines — Giisip nga malampuson ug mabulokon ang gipasiugdahan nga tinuig nga “Garbo Festival 2019” sa Dakbayan sa Lapu-Lapu nga giapilan sa siyam ka contingents gikan sa gi-cluster nga mga barangay.

Natigayon ang maong indigay nga nagsugod sa street dancing sa dalan S. Osmeña sa Barangay Poblacion ug ilang gitapos pinaagi sa showdown nga gipahigayon sa Hoopsdome sa Barangay Gun-ob.

Hinoon ang mga contingents nga niapil sa pagpasundayag sa ilang mga produkto ang wala na idumala sa mga barangay kapitan tungod kay ang mga tunghaan na man nga ubos sa pagtugot sa Department of Education ang nangulo.

Ang mga publikong tunghaan pinagi sa ilang mga tinun-an maoy nipasundayag sa ilang street dancing ug showdown competition.

Naglakip sa mga gipasundayag sa mga contingents sa Garbo Festival ang poso, firecracker, Mactan stone, pagmuhat og pisi, pagpanggama og motorbanca, gitara ug uban pa.

Nisalmot sa parada ang Philippine Air Force, Philippine National Police, Philippine Navy ug daghan pa.

Makadawat usab og ganti ang mga mananaug sa maong indigay uban sa mga drum and bugle corps gikan sa mga tunghaan sa dakbayan. (Romeo T. Limpangog/GMR)

Ambush sa Eastern Samar gikondenar sa OPAV

Nakapasubo sa tibuok nasud ang nahitabong pagpamanhig didto sa Eastern Samar nga nikalas og unom ug niangol og 20 ka sundalo sumala pa ni Presidential Assistant for the Visayas Michael Lloyd Dino.

Apan bisan pa niini, misamot hinuon ang tinguha sa gobiyerno nga mahunong na kining insurhensiya sa nasud nga maoy nakapabira paubos sa mga kabus diha sa kabukiran.

 “I strongly condemn the incessant attacks from these communist rebels of the New People’s Army. They have terrorized this country for very long and it is about time to end this perennial conflict,”  sumala pa sa pamahayag nga giluwatan ni Dino.

Nanawagan si Dino og panaghiusa sa tanan aron paghunong na niining insurhensiya, matud niya mao kini ang tumong sa gipagawas nga Executive Order No. 70 o National Task Force to End Local Communist Armed Conflict ni Pres. Duterte.

“As our armed forces continue to neutralize this armed insurgence, we in OPAV together with other national government agencies continue to spread this campaign through our Serbisyong Malasakit to cover all the far-flung areas in the Visayas with government services,” matud pa sa kalihim.

Sa samang higayon, gipanawagan ni Dino ang mga rebelde nga mobalik na sa sabakan sa balaod tungod kay dili mohunong ang gobiyerno paggukod kanila hangtud nga sila mapuo.

Sumala pa ni Dino ang administrasyong Duterte andam mosuporta ug motabang sa mga rebeldeng mobalik sa gobiyerno aron sila makabalik sa normal nga pagpuyo.

“We will be providing you with the basic services so that you too may feel that the government under this administration is really working to provide a happy and comfortable life for all,” dugang pa ni Dino. (/ IBM)