Gilugos sa naamigo niya pinaagi sa facebook

CEBU, Philippines — Gidakop ang usa ka 15 anyos nga batang lalaki human siya gipasanginlan nga nilugos sa 17 anyos nga babaye diha sa Sitio Rilis, Barangay Tulay, lungsod sa Minglanilla.

Nahitabo ang giingon nga pagpanglugos niadtong Biyernes sa gabii apan nasikop ang suspek niadto lang Sabado sa gabii dihang nipiyait ang biktima ug nisumbong sa mga kabanay.

Si Police Senior Master Sergeant Dante Valiente, desk officer sa Minglanilla Police Station nibutyag gikuyogan ang biktima sa iyang bayaw ug usa ka konsehal sa ilang barangay aron isumbong ang panghitabo sa kapulisan.

Ang biktima nisaysay sa mga otoridad nga nagkaila sila ang suspek pinaagi sa Facebook ug nagka chat sila sa messenger duha ka adlaw sa wa pa ang giingon nga pagpanglugos.

Nagkasabot ang duha nga anha mag-abot sa panimalay sa igsuon niining babaye aron mag movie marathon kay wala didto ang ginikanan sa babaye kay namauli sa Mindanao. Apan didto giingong gilugos sa suspek ang biktima.

Ang kapulisan dali nga miresponde ug nisikop sa suspek kinsa nihimakak nga dunay nahitabo pagpanglugos kay matud niini nisugot man ang babaye sa ilang gibuhat.

Matud ang Valiente, miinsister ang suspek nga siya ang giimbitar sa biktima nga moduaw sa pinuy-anan niini aron mag movie marathon.

Gitug-an sab sa suspek nga nadelatar ang oras sa ilang sabot kay gipaabot pa sa biktima nga mobiya ang iyang ate sa panimay.

Karon nga gipasakaan siya og kaso, ang suspek mipadayag nga atubangon nalang kini didto sa korte. (/IBM)(BANATNEWS)