Kapolisan aduna nay POI sa pagpamanhig

CEBU, Philippines — Ang kabahin sa away sa quarry maoy gitan-aw karon nga motibo sa pagbanhig patay sa amahan ug anak nga parehong konsehal sa Barangay Kalamtukan sa Dakbayan sa Bayawan, Negros Oriental. 

Kini ang gibutyag sa direktor sa Negros Oriental Provincial Police Office (NORPPO) Police Colonel Julian Entoma.

Matud ni Entoma nga aduna na usab sila’y usa ka person of interest nga maoy gikatahapan sa pamilya sa mga biktima.

Ang maong gidudahan gipatawag sa kapolisan aron kini ipaubos sa imbestigasyon.

Giingong panagbangi sa quarry ang gidudahang motibo sa maong pagpamanhig ilabi na nga adunay mga quarry ngadto sa Barangay Kalamtukan.

Ang haya sa mga biktima nga sila si Felipe Condes, Jr. ug anak niining si Geonesis gipahimutang ngadto sa ilang panimalay.

Gisusi usab sa kapolisan ang panimalay sa nahisgutang POI apan giingong sukad nga nahitabo ang pagpamanhig wala na kini nipakita sa ilahang panimalay.

Ang kapolisan nagpadayon og follow-up nga operasyon batok sa mga kriminal.

Kahinumduman nga ang mga biktima nagsakay kini og usa ka motorsiklo nga gimaneho ni Geonesis samtang nagbiyahe paingon na untang mopauli  dihang gisundan kini sa riding in tandem. (/BDB)(BANATNEWS)