Babaye gidakop sulod sa korte

CEBU, Philippines – Gidakop ang negosyanteng babaye sa mga sakop sa Criminal Investigation and Detection Group pinasikad sa lima ka kasong estafa.

Giila ang dinakpan nga si Raquel Undang alyas Raquel Cordova human malutsi og warrant of arrest sa Municipal Trial Court in Cities (MTCC) Branch 5 sa Dakbayan sa Sugbo nga giluwatan ni Judge Vivien Leigh Santiago-Lumangtad niadtong Oktubre 16.

Matud ni CIDG-7 Deputy Regional Director, Police Major Ronald Allan Tolosa, nga nakadawat sila og impormasyon nga nasigpatan si Undang sa korte aron unta mopiyansa sa iyang kaso apan nasuta nga aduna pa kini lain pang warrant of arrest sa kasong estafa hinugdan nga ila kining gi-served sulod mismo sa korte.

Mokabat sa P15 milyones nga balor sa alahas ang giingong wala nabayri ni Undang sukad pa niadtong tuig 2017 dihang gisingil sa iyang supplier sa mahalong alahas.

Giangkon hinoon ni Undang nga aduna siya utang sa alahas apan wala siya magdahum nga dali ra kaayo siya nalutsan og warrant of arrest.

Gihimakak usab ni Undang nga sukad nga gipasakaan siya og kaso sa iyang supplier wala siya magtago-tago ug anaa ra siya sa ilang balay sa Dakbayan sa Toledo diin didto usab siya unang nadakpan sa kapolisan.

Gihimakak niya nga moabot sa P15 milyones ang iyang utang sa alahas samtang duna siyay ebidensya kung kinsa ang nakakuha sa gibaligya niyang alahas apan dili na siya makapaningil human nga nipagawas og pahibawo ang  dealer nga wala na siyay katungod nga mokuha sa bayad ug gipasirad-an na usab ang iyang account sa bangko.

Ang mga dokumento nga iyang gihuptan iya kining ipresentar sa korte diin magpamatuod nga wala niya gidagan ang halin sa alahas sanglit anaa pa kini sa iyang mga kustomer.

Matud niya nga nasagmuyo siya tungod kay ang nagpasaka kaniya og kaso ang iya ra sab nga suod nga higala nga maoy kanunay nga modala kaniya sa ilang pagsuroy-suroy sa gawas sa nasud.

Aduna pay lawom nga hinungdan matud ni Undang kung nganong gipasakaan siya og daghang kaso.

Kasamtangan nga gitanggong sa CIDG-7 detention cell si Undang. (/GMR)(BANAT NEWS)