Garcia ug mga mayor supak sa technolympics

CEBU, Philippines – Si Gobernador Gwendolyn Garcia ug mga mayor nipadayag nga dili motugot nga ang Department of Education (DepEd) Cebu Province mopahigayon og technolympics.

Ang technolympics usa ka matang sa kalihukan sa DepEd sa paghanas sa abilidad sa mga bata sama sa dish gardening, landscaping, carpentry ug uban pa.

Si Garcia nagkanayon nga dako ang risgo sa maong kalihukan hilabina sa pagbiyahe sa mga bata ngadto sa Isla sa Bantayan diin adto kini ipahigayon.

“Molabay pa gud na og dagat, ang kadaghanan maggikan sa south or uban sa western part. It’s not only ang distance that they have to travel by land, but crossing over San Remegio to Bantayan”, padayag ni Garcia.

Atol sa tigom ni Garcia ug ubang mga mayor sa probinsya lakip na kang Dr. Marilyn Andales, bag-ong provincial school division superintendent nahisgutan ang kabalaka sa mga mayor.

Pipila sa mga mayor nabalaka nga ang ubang tinun-an mabiyaan na ang klase tungod kay ang magtutudlo nahimong coach sa pili nga mga estudyante alang sa tecnhnolympics.

Ug alang kang Garcia nga kinahanglan ang DepEd magtutok sa academic excellence sa mga estudyante.

Si Garcia nidugang nga ang mga tinun-an sa elementarya dili pa kini dayon makadesisyon kon unsay ilang itinguha nga skills sa umaabot kong mahingkod na sila.

Nagtuo si Garcia nga ang paghanas sa skills sa usa ka indibidwal tahas kini sa Technical Education and Skills Development Authority (TESDA).

Si Andales sa iyang bahin nagkanayon nga iyahang i-refer ngadto sa DepEd ang concern ni Garcia ug sa mga mayor sa probinsiya. (/BDB)(BANAT NEWS)