Palma nasurpresa kang Robredo
CEBU, Philippines — Nasurpresa si Cebu Archbishop Jose Palma samtang malipayon nga gidawat ni Bise Presidente Leni Robredo ang pagtudlo kaniya ni Presidente Rodrigo Duterte isip co-chairperson sa gubat batok sa ginadili nga drugas nga iyang gihulagway nga dakung hagit. Matud ni Palma nga ang tinguha ni Robredo nga walay mamatay atol sa operasyon batok sa ginadiling drugas usa ka maayong sanglitanan ug ipatigbabaw ang tawhanong katungod.
Nasurpresa ang Arsobispo tungod kay daghan ang nagtuo nga dili dawaton sa bise presidente ang tahas basin maghatag kini kaniya og kapakyasan.
Maampoon usab ang Arsobispo alang sa tahas sa bise presidente.
Samtang gipasalig sa Cebu City Police Office nga hingusgan pa ang ilang kampanya batok sa ilegal nga drugas.
Matud ni CCPO acting Director, Police Colonel Geovanie Maines, nga bisan pa man nga nag-una ang CCPO sa tibuok Central Visayas batok sa ilegal nga drugas dili gihapon sila mohunong ug mas palawman pa nila ang ilang intelligence gathering.
Sa pikas bahinb gisaway sa CCPO ang sugyot sa pagdili sa mga awtoridad nga magdala og armas atol sa mga drug operations tungod kay walay kasiguradohan nga dili armado ang tumong sa operasyon.
"Part yan ng uniform namin, part yan ng equipment ng PNP," matud ni Maines. Dugang pa ni Maines nga mao sab ang gusto nila nga walay mamatay sa operasyon apan adunay pipila ka drug personalities nga mosukol sa awtoridad. GMR (BANATNEWS)
- Latest
