Bantayan tangtangon isip ‘wilderness’
CEBU, Philippines — Giaprobahan na sa Ubos-Balay Balauranan ang balaudnon nga magwagtang sa Isla sa Bantayan gikan sa mga lugar nga giilang wilderness protected zone area.
Pasabot niini nga ang mga nanag-iya og luna sa isla mahimo na nga makapatitulo sa ilang luna.
Ang House Bill No. 4951 giaprobahan niadtong Nobiyembre 4, 2019 base sa rekomendasyon sa House Committee on Natural Resources ug giduso na ngadto sa Senado.
Ang balaudnon hulip sa HB No. 3861 nga giduso ni Kongresista Janice Salimbangon sa ikaupat nga distrito sa Lalawigan sa Sugbo diin nasakop ang Isla sa Bantayan nga gilangkuban sa mga lungsod sa Bantayan, Madridejos ug Sta. Fe tumong sa pag-usab sa Presidential Proclamation No. 2151 nga giluwatan ni kanhi presidente Ferdinand Marcos. Hinoon dunay mga lugar sama sa gagmay nga mga isla ang pabiling protektahan.
Kini sama sa Sillon, Pananganlan Gamay, Pananganlan Dako, Botong Diot, Botong Dako, Sagasa, Sulagon Dako, Sulagon Gamay, Biyagayag Dako, Biyagayag Gamay, Mambacayao Dako, Mambacayao Gamay, ug uban pang isla nga walay pangan subay sa National Integrated Protected Areas System (NIPAS) Act of 1992. Ang bana ni Salimbangon nga si kanhi kongresista Benhur Salimbangon ang unang niduso sa susamang balaudnon nga aprobado sa 17th Congress apan wala na naapas sa panahon sa Senado.
Gipaabot nga paspas na unya ang pagpalambo sa lugar kung malibkas na ang proklamasyon.
Gisanglitanan ang niaging bagyong Yolanda niadtong 2013 nga nagduha-duha ang mga langyaw nga mga organisasyon sa pagpatukod og mga balay sa luna tungod kay dili titulado.
Malaumon si Salimbangon nga matugbangan ang balaudnon sa Senado aron hingpit na kining mapasar. (BANATNEWS)
- Latest
